اسلام آباد(نیوزڈیسک)وفاقی وزیر احسن اقبال نے پاک چین اقتصادی راہداری کے مغربی روٹ پر بریفنگ کےلئے عوامی نیشنل پارٹی سے رابطہ کیا جبکہ اے این پی نے اس سے پہلے مغربی روٹ پر کام شروع کرنے کی شرط رکھ دی ہے۔اے این پی کے مرکزی سیکرٹری اطلاعات سینیٹر زاہد خان کی طرف سے جاری ہونے والے بیان کے مطابق احسن اقبال کے رابطے کے جواب میں پارٹی کے سربراہ اسفند یار ولی خان کی طرف سے کہاگیا ہے کہ عوامی نیشنل پارٹی میں آل پارٹیز کانفرنس میں وزیر اعظم کی طرف سے مغربی روٹ پر کام شروع کرنے کے وعدے پر عمل نہ کرنے تک پاک چین اقتصادی راہداری پر بریفنگ اور کسی بھی اجلاس کے وقت میں شرکت سے مشروط کر دیا ہے۔ زاہد خان نے کہا کہ پاک چین اقتصادی راہداری کے ذریعے ملک بھر کے پسماندہ علاقوں کو فوائد حاصل ہوں گے۔لیکن قوم کا یہ سوال اپنی جگہ سچا اور درست ہے کہ مشرقی روٹ پر کئی منصوبوں کا اافتتاح کیا جا رہا ہے ۔جب تک مغربی روٹ پر توانائی منصوبوں اور صنعتی زونوں کے منصوبوں کے کام کا آغا ز نہیں کیا جاتا اسوقت تک عوامی نیشنل پارٹی کسی بھی حکومتی وعدے پر یقین نہیں کر سکتی۔زاہد خان نے وزیراعظم سے مطالبہ کیا ہے کہ قوم کو تقسیم ،حکومت کو بدنام اور پاک چین اقتصادی راہداری کو متنازعہ بنانے والے وزراءکی زبان بندی کرائیں۔وفاقی وزیر احسن اقبال کے بیانات ،غلط فہمیاں پھیلانے والے ہیں۔زاہد خان نے مزید کہا کہ انگریز کے خلاف عملی جدوجہد کرنے اور پاکستان کی حفاظت کےلئے کردار ادا کرنے والوں کو کسی سے حب الوطنی کا سرٹیفکیٹ لینے کی ضرورت نہیںہے۔