اسلام آباد (نیوز ڈیسک)نیو اسلام آباد انٹرنیشنل ایئر پورٹ اکتوبر 2016ء کی ڈیڈ لائن تک مکمل کر لیا جائے گا ٗ ایئر پورٹ کی پانی کی ضروریات پوری کرنے کیلئے راما ڈیم رواں ماہ سے کام شروع کر دے گا۔ ایئر پورٹ پر دو رن ویز، 6 ٹیکسی ویز، 5 اپرنس، 15 پسنجر بورڈنگ بریجز، 42 امیگریشن کاؤنٹرز سمیت جدید سہولیات شامل ہونگی۔ بدھ کو پاکستان سول ایوی ایشن اتھارٹی کے پراجیکٹ ڈائریکٹر بریگیڈیئر (ر) پرویز ایچ نیازی نے بتایا کہ بینظیر انٹرنیشنل ایئر پورٹ کی تکمیل میں اراضی کے حصول میں تاخیر، ڈائریکٹرز کی بار بار تبدیلی، بین الاقوامی کمپنیوں کے ساتھ معاہدوں کی منسوخی، ایئر پورٹ تک آسان رسائی اور پانی و بجلی کی سہولتیں میسر نہ ہونے سمیت مختلف وجوہات کے باعث تاخیر ہوئی تاہم ایئر پورٹ کا 85 فیصد کام مکمل کر لیا گیا ہے اور اپنی ڈیڈ لائن تک تمام کام مکمل کر لیا جائے گا۔ انہوں نے بتایا کہ ایئر پورٹ پر 90 چیکنگ کاؤنٹرز قائم کئے جائیں گے اس کے علاوہ ہزاروں گاڑیوں کی پارکنگ کی سہولت میسر ہو گی جبکہ ایئر پورٹ پر تمام جدید سہولیات فراہم کی جائیں گی اور دنیا کے جدید اور بڑے جہاز بشمول ایئر بس A380 ایئر پورٹ پر لینڈ کر سکیں گے۔ انہوں نے بتایا کہ ایئر پورٹ پر سیکورٹی کا بھی جدید نظام نصب کیا جائیگا ٗ ایئر پورٹ تک آسان اور بہتر رسائی کیلئے وزیراعظم محمد نوازشریف نے کشمیر ہائی وے تک سڑک کی تعمیر کی منظوری دیدی ہے۔