لاہور(نیوزڈیسک) لاہور ہائیکورٹ نے پاکستان پیپلز پارٹی کی سابق رکن قومی اسمبلی راحیلہ بلوچ کی نیب کے روبرو ناجائز اثاثے بنانے کے الزام میں زیر التواءانکوائری میں ضمانت منظور کر تے ہوئے ہدایت کی ہے کہ تحقیقات جاری رکھی جائیں ، ثبوت ملنے پر گرفتاری سے قبل عدالت کو آگاہ کیا جائے ۔ گزشتہ روز لاہور ہائیکورٹ کے جسٹس محمود مقبول باجوہ اور جسٹس مرزا وقاص رف پر مشتمل دو رکنی بینچ نے کیس کی سماعت کی ۔راحیلہ بلوچ کی جانب سے موقف اختیار کیا گیا کہ نیب حکام نے اس کے خلاف ناجائز اثاثے بنانے کے الزام میں انکوائری شروع کر رکھی ہے ، جس میں وہ پیش بھی ہو رہی ہیں تاہم تحقیقات کے نام پر انہیں ہراساں کیا جار ہا ہے اور خدشہ ہے کہ انہیں گرفتار کر لیا جائے گا۔نیب حکام کا کہنا تھا کہ راحیلہ بلوچ نے بطور رکن اسمبلی اپنی آمدن سے زائد اثاثے بنائے ۔ عدالت نے سابق رکن قومی اسمبلی کی ضمانت منظور کرتے ہوئے انہیں ایک لاکھ روپے کے مچلکے بطور زر ضمانت جمع کروانے کی ہدایت کی ۔ عدالت نے نیب حکام کو ہدایت کی کہ وہ راحیلہ کے خلاف انکوائری جار ی رکھیں تاہم ٹھوس شواہد ملنے پر گرفتاری سے قبل عدالت کو آگاہ کیا جائے ۔