لندن(آئی این پی )برطانوی حکومت نے داعش کے خطرے سے نمٹنے کے لیے ملک کے سکیورٹی اداروں کے فنڈ میں اضافے کا اعلان کردےا،فنڈ کی مدد سے برطانیہ کی اہم سکیورٹی ایجنسیاں ایم آئی 5، ایم آئی 6 اور جی سی ایچ کیو مزید 1900 افسران کی تقرریاں کر سکیں گی، توقع کی جا رہی ہے کہ رواں ہفتے برطانیہ کی کابینہ ایوی ایشن سکیورٹی فنڈ کو دگنا کرنے پر رضامند ہو جائے گی۔برطانوی مےڈےا کے مطابق یہ اعلانات جمعے کو پیرس میں دہشت گردانہ حملوں کے بعد کیے گئے جن میں اب تک ایک برطانوی شہری سمیت تقریبا 129 افراد ہلاک ہوچکے ہیں۔ ان حملوں کی ذمہ داری دولت اسلامیہ نے قبول کی ہے۔وزیر اعظم ڈیوڈ کیمرون نے کہا ہے کہ ہماری نسل کی یہ جدوجہد مطالبہ کرتی ہے کہ ہم اپنے ملک اور تہذیب کو تباہ کرنے والی قوتوں سے مقابلہ کرنے کے لیے مزید افرادی قوت جمع کریں۔برطانیہ کے تین اہم حساس اداروں کے عملے میں 15 فیصد اضافے کے لیے امداد کا انکشاف ہفتے کو حکومت کے متوقع سٹریٹجک ڈیفنس اینڈ سکیورٹی ریویوکے شائع ہونے سے قبل ہی سامنے آ گیا ہے ۔برطانیہ کے حساس اداروں میں 12 ہزار سات سو افراد پہلے سے ہی کام کر رہے ہیں۔