شارجہ(نیوز ڈیسک) انگلینڈ کرکٹ ٹیم کے اوپنر جیسن روئے نے اعتراف کیا ہے کہ پاکستان کے خلاف ون ڈے سیریز میں دیوقامت باولر محمد عرفان کا سامنا کرنا بہت بڑا چیلنج ہے۔7 فٹ ایک انچ لمبی جسامت کے حامل محمد عرفان نے انگلینڈ کے خلاف جاری سیریز کے پہلے ون ڈے میچ میں جیسن روئے کو دوسری گیند پر بولڈ کردیا تھا اور مجموعی طورپر 35 رنز کے عوض 3 وکٹیں حاصل کی تھیں جبکہ پاکستان نے اس میچ میں 6 وکٹوں سے کامیابی حاصل کی تھی۔واضح رہے کہ محمد عرفان کرکٹ کی تاریخ کے لمبے ترین باولر ہیں۔جیسن روئے کا کہنا تھا کہ عرفان واقعی ایک دیو ہیں۔ ان کا کہنا تھا کہ جس طرح عرفان نے پہلے میچ میں میرے خلاف باولنگ کی تھی، یہ مختلف تھا، اس کے لیے عادی ہونے کی ضرورت ہے اور اس پر کام کرنا پڑے گا لیکن ان سے نمٹنا واقعی بہت مشکل ہے۔ انھوں نے کہا کہ عرفان جو دکھائی دیتے ہیں اس سے زیادہ تیز نظر آتے ہیں کیونکہ وہ تقریبا 12 فٹ کی اونچائی سے گیند پھینکتے ہیں لیکن مجھے سرے کاونٹی میں کرس ٹریملٹ جیسے لمبے باولروں کے خلاف کھیلنے کا کچھ تجر بہ حاصل ہے ۔