میانوالی(نیوزڈیسک)پاکستان تحریک انصاف کے چیئرمین عمران خان نے الزام عائد کیاہے کہ وزیر اعظم نواز شریف اور وزیر اعلیٰ پنجاب شہباز شریف قوم کے خزانے سے اپنی اشتہاری مہم چلاتے ہیں تاہم وہ اب قوم کو دھوکا نہیں دے سکتے۔میانوالی میں ریلی سے خطاب کے دوران عمران خان نے کہا کہ بھارت کا کسان پاکستان کے مقابلے میں زیادہ خوشحال ہے، بھارتی حکومت کسانوں کو کیڑے مار دوا سستے داموں دیتی ہے، بھارت میں بجلی کا ایک یونٹ بجلی 57 پیسے کا ہے، جس کی وجہ سے کسان کے اخراجات میں کمی اور اس کا منافع زیادہ ہے۔ہمارے یہاں کسان مررہا ہے اور غربت بڑھ رہی ہے جب کہ حکومت کسانوں پر نہیں میٹرو پر پیسا خرچ کررہی ہے۔ پاکستانی قوم میں غربت بڑھ رہی ہے اور حکمرانوں نے 150 ارب کی میٹرو بنادی۔عمران خان نے کہا کہ میاں برادران نے نندی پور پاور پراجیکٹ کے حوالے سے صرف اعلانات کئے مگر آج تک اس حوالے سے عملی اقدامات نہیں کئے گئے۔ انہوں نے عوام کی دولت سے اربوں روپے کی تشہیری مہم چلائی، خیبر پختونخوا حکومت کے کسی اشتہار میں ان کی تصویر نہیں چھپتی کیونکہ ہم عوام کی فلاح پر یقین رکھتے ہیں۔ نواز شریف اب قوم کو دھوکا نہیں دے سکتے۔انہوں نے کہا کہ خیبرپختونخوا میں آپ کو کسی بھی سرکاری کام پر عمران خان کی تصویر نظر نہیں آئے گی۔انہوں نے کہا کیونکہ عمران خان نے اللہ کو جواب دینا ہے اس لیئے قوم کا پیسہ خود پر نہیں لگاتا۔انہوں نے کہا کہ میانوالی کے لوگو ایک بار پھر میری لاج رکھنا اور بلے پر ہی مہر لگانا ۔وزیر اعظم پر الزام لگاتے ہوئے چیئرمین تحریک انصاف نے کہا کہ ملک میں غربت بڑھ رہی ہے ¾ نواز شریف نے 150 ارب روپے کی 2 فیکٹریاں بنائیں۔