واشنگٹن(نیوزڈیسک)آرمی چیف جنرل راحیل شریف کے آئندہ ہفتے دورہ امریکا کے دوران جوہری معاملات پر امریکا سے کوئی مذاکرات نہیں ہوں گے۔نجی ٹی وی نے سفارتی ذرائع کے حوالے سے بتایا کہ جنرل راحیل شریف کے دورے کے دوران بھارت کے وزیر دفاع بھی امریکا میں موجود ہوں گے۔ایک اور ذرائع کے مطابق اگر امریکا کی طرف سے جوہری معاہدے کا معاملہ اٹھایا گیا تو پاکستان کی طرف سے جواباً بھارت کی سرد مہری کا معاملہ اٹھایا جائےگا جس کے باعث یہ صورتحال پیدا ہوئی۔واضح رہے کہ پاکستان یہ معاملہ بار بار اٹھاتا رہا ہے کہ بھارت دونوں ممالک کی سرحد کے قریب فوجی چھاو ¿نیاں اور ایئر بیس قائم کر کے جارحیت بڑھا رہا ہے جس کے باعث پاکستان اپنے جوہری ہتھیاروں کی تعداد میں اضافہ کرنے لگا۔ امریکی میڈیا کی رپورٹس کے مطابق جنرل راحیل شریف کے دورے کے دوران امریکی حکام پاکستان پر جوہری پالیسیوں پر نظر ثانی کے حوالے سے زور دیں گے۔میڈیا رپورٹس میں نامعلوم امریکی ذرائع کا حوالہ دیتے ہوئے بتایا گیا کہ بھارتی جارحیت کے حوالے سے پاکستان کا خوف بے بنیاد ہے تاہم سفارتی ذرائع کا کہنا ہے کہ اس وقت، ریاست راجستھان میں بھارتی فوج کے 21 دستے پاکستان کے خلاف فعال حکمت عملی تیار کرنے کےلئے مشقیں کر رہے ہیں۔ذرائع نے کہا کہ امریکا کے ساتھ پاکستان کا جوہری معاملہ دوطرفہ نہیں . ہمارا جوہری پروگرام ہندوستان سے بڑھتے ہوئے خطرات کے پیش نظر ترتیب دیا گیا اور صرف بھارت ہی اس حوالے سے ہمارے تحفظات دور کرسکتا ہے۔دوسرے ذرائع کا کہنا ہے کہ آرمی چیف کے دورے کے دوران افغانستان کے معاملات پر توجہ مبذول کی جائے گی۔