اسلام آباد (آن لائن) پاکستان پیپلزپارٹی نے پاکستان مسلم لیگ (ن) سے مفاہمت کی پالیسی کے خاتمے کے باوجودقومی اسمبلی میں سپیکر کے لئے ایاز صادق کی حمایت کر کے اپنے ہی اعلان کی نفی کر دی ہے اس حوالے سے پیپلزپارٹی کے اکثر رہنماﺅں میں تشویش پائی جاتی ہے کہ ایاز صادق کی حمایت پیپلزپارٹی کے اپنے ہی کیے گئے فیصلے کی خلاف ورزی ہے۔ ذرائع کے مطابق پاکستان پیپلزپارٹی نے کئی مرتبہ مفاہمت کی پالیسی ترک کرنے کا اعلان کیا ہے اور کہا ہے کہ اب فرینڈلی اپوزیشن نہیں ہو گی بلکہ حقیقی اپوزیشن کی جائے گی۔ پاکستان پیپلزپارٹی کے رہنماﺅں کو نیب کی طرف سے بہت سارے کیسوں کا سامنا کرنا پڑ رہا ہے اس وجہ سے پاکستان پیپلزپارٹی نے مفاہمت کی پالیسی ختم کرنے کا کئی بار اعلان کیا ہے لیکن سپیکر قومی اسمبلی کے لئے پاکستان پیپلزپارٹی نے پھر اپنے کئے ہوئے اعلان سے انحراف کیا ہے ۔ ایاز صادق کی حمایت کے اعلان کے بعد جب پاکستان پیپلزپارٹی کی سینیٹر روبینہ خالد سے آن لائن کی طرف سے رابطہ کیا گیا تو انوہں نے بتایا کہ پاکستان مسلم لیگ (ن) کے امیدوار ایک اچھے انسان ہیں اس لئے ہم ان کی حمایت کر رہے ہیں اور پاکستان مسلم لیگ (ن) سے مفاہمت کی پالیسی کے خاتمے پر ہم قائم ہیں صرف ایاز صادق ایک اچھے انسان ہونے کی وجہ سے ان کی حمایت کی جا رہی ہے دوسری طرف ذرائع کا کہنا ہے کہ پاکستان پیپلزپارٹی کے اکثر رہنما اس فیصلے سے خوش نہیں ہیں کیونکہ وہ چاہتے ہیں کہ اگر پارٹی نے مفاہمت کی پالیسی کا خاتمہ کر دیا ہے تو پھر پاکستان مسلم لیگ (ن) کے امیدوار کی حمایت کرنے کی کیا ضرورت ہے بلکہ پاکستان پیپلزپارٹی کو دوسری اپوزیشن جماعتوں سے مل کر اپنا امیدوار لانا چاہئے تھا اس فیصلے سے پیپلزپارٹی کے جیالوں کی دل آزاری ہوئی ہے ۔
مزید پڑھئیے: کیا عمران خان تیسری شادی کرنے والے ہیں ؟ سینئر اینکر کا دلچسپ جواب
مزید پڑھئیے: آسف علی زرداری اگلے اتوار گرفتار ہونے والے ہیں، ایک سینئر اینکر کا انکشاف