واشنگٹن(نیوز ڈیسک)سابق امریکی صدر جان ایف کینیڈی اپنے قتل کے وقت جس گاڑی میں سوار تھے اس کی لائسنس پلیٹس نیلامی کے دوران ایک لاکھ ڈالر میں فروخت ہوئی ہیں۔نومبر سنہ 1963 میں امریکی ریاست ٹیکساس میں صدر کینیڈی کے قتل کے بعد اس لیموزین گاڑی کو اپ گریڈ کرنے کے لیے بھیج دیا گیا تھا اور ان پلیٹس کو ترک کر دیا گیا تھا۔بعد میں کمپنی کے مالک نے ان پلیٹس کو حاصل کیا اور اپنی بیٹی کو دے دیا تھا۔امریکی شہر ڈیلس میں ہونے والی اس نیلامی میں امید کی جا رہی تھی کہ GG_300 نمبر کی ان پلیٹس کی زیادہ سے زیادہ بولی 40 ہزار ڈالر تک لگ سکتی ہے۔جان والکر جن کے پاس یہ لائسنس پلیٹس تھیں اور انھوں نے اسے کچن کی الماری میں رکھا ہوا تھا کا کہنا ہے کہ ’میں ان کی اہمیت سے بخوبی واقف تھا۔‘’کبھی کبھار میں انھیں نکال کر اپنے دوستوں کو دکھایا کرتا تھا۔‘آکشن کمپنی کا کہنا ہے کہ ان پلیٹس کو ’بڑے پیمانے پر کینیڈی سے جڑی چیزیں جمع کرنے والے ایک شخص نے خریدا ہے جو اپنی شناخت ظاہر نہیں کرنا چاہتے۔‘ان لائسنس پلیٹس کے علاوہ نیلامی میں بحری جہاز ٹائٹینک کے ڈوبنے سے قبل پیش کیے جانے والے رات کے کھانے کا مینیو شامل تھا جو 118,750 ڈالرز میں فروخت ہوا۔