لاہور(نیوزڈیسک)پاکستان کے سپنر یاسر شاہ کی انگلینڈ کے خلاف ٹیسٹ سیریز میں شاندار پرفارمنس نے تو پاکستانیوں کے دل جیت لئے لیکن شارجہ ٹیسٹ کے چوتھے روز انہوں نے انگلش بلے باز کو ایک ایسی گیند پر آئوٹ کیا جس کا چرچا پوری دنیا میں ہو رہا ہے اور دنیا بھر کے کئی خبر رساں ادارے بھی اسے نظرانداز نہ کر سکے اور شہ سرخیوں میں اس گیند اور یاسر شاہ کا ذکر کرتے رہے۔اس ایک ڈلیوری کے بعد ہرکوئی یاسر شاہ کا دیوانہ نظر آیا، کئی افراد نے تو اس بال کو بال آف دی سنچری بھی قرار دیدیا۔انہوں نے انگلش بلے باز سمیت پٹیل کو جس طرح پویلین کی راہ دکھائی اس سے ناصرف آسٹریلیا کے لیجنڈ سپنر شین وارن کی یاد تازہ ہو گئی ۔انگلینڈ جو اپنی دوسری اننگز کھیل رہا تھا اور اس کی بیٹنگ لائن مشکلات کا شکار تھی، 287 رنز پر 7 کھلاڑی آٹ ہو چکے تھے اور اسے ابھی پاکستان پر صرف 53 رنز کی برتری ہی حاصل ہو سکی تھی۔سمیت پٹیل پراعتماد بلے بازی کر رہے تھے اور 42 رنز بنا چکے تھے مگر یاسر شاہ نے سٹارٹ لیا، بازو گھمایا اور گیند پھینک دی، لیگ سٹمپ کی جانب گرتی گیند دیکھ کر سمیت پٹیل بھی تیار ہو گئے لیکن گیند کچھ اس انداز سے پھینکی گئی تھی کہ آف سٹمپ پر جا لگی، سمیت پٹیل کو اپنی آنکھوں پر یقین نہ آیا، یاسر شاہ نے فخریہ انداز میں ہاتھ ہوا میں بلند کئے تو کھلاڑی انہیں مبارکباد دینے پہنچ گئے، کمنٹیٹرز سے بھی رہا نہ گیا اور ایسے القابات سے نوازا جو کم ہی کسی بائولر کیلئے ادا کئے جاتے ہیں۔اس ایک گیند سے یاسر شاہ کی صلاحیتوں کا اظہار کھل کر ہوا ہے، کرکٹ کے بابے بھی یاسر شاہ کو دنیا کا سب سے بڑا سپنر قرار دینے پر مجبور ہو گئے ہیں۔کئی ماہرین کا کہنا ہے کہ اگر وہ اسی طرح کھیلتے رہے تو کوئی بعید نہیں کہ وہ کئی ریکارڈز توڑیں گے اور کئی نئے ریکارڈز بھی بنائیں گے۔