لاہور (نیوز ڈیسک)لاہورکے سانحہ فیکٹری میں جاں بحق ہونے والوں کی تعداد 28 ہو گئی ہے۔ملبہ ہٹانے اور زخمیوں کو نکالنے کا سلسلہ آج تیسرے روز بھی جاری ہے۔سندر انڈسٹریل اسٹیٹس میں بدھ کی شام گرنے والی فیکٹری میں امدادی کارروائیوں کا آج تیسرا دن ہے۔ فیکٹری کے ملبے تلے سے اب تک 28 لاشیں اور سو سے زائد زخمیوں کو نکالا جاچکا ہے۔ اپنے پیاروں کے زندہ ہونے کی آس لیے اب بھی کئی افراد فیکٹری کے باہرموجود ہیں۔پاک فوج ،ریسکیو 1122 بحریہ ٹاؤ ن اور دیگر اداروں کی ٹیمیں امدادی کاموں میں شریک ہیں۔ہیوی مشینری کی مدد سے گرے ہوئے لینٹرکو کاٹا جا رہا ہے اور یہ عمل فلور وائز کیا جارہا ہے۔حکام کا کہنا ہے کہ گرے ہوئے لینٹر کی وجہ سے ریسکیو ٹیموں کیلیے اندر داخل ہونے میں مشکلات پیش آرہی ہیں ، حکام کے مطابق فیکٹری کے نو کوارٹرز تک پہنچنے کی کوشش کی جا رہی ہے جہاں اگلی شفٹ میں آنے والے ملازم موجود تھے۔یہ بات بھی مشاہدے میں آئی ہے کہ فیکٹری کی تعمیر بغیر پلاننگ کے کی گئی ،حفاظتی تدابیر اور اقدامات کو بھی مدنظر نہیں رکھا گیا۔