اسلام آباد (نیوز ڈیسک)پاکستان میڈیکل اینڈ ڈینٹل کونسل (پی ایم ڈی سی) نے افغانستان میں میڈیکل تعلیم حاصل کرنے والے یا وہاں داخلے کے خواہشمند پاکستانی طلبہ کے لیے اہم ہدایات جاری کر دی ہیں۔

پی ایم ڈی سی کی جانب سے جاری کردہ ایڈوائزری میں واضح کیا گیا ہے کہ افغانستان کے میڈیکل کالجز سے ڈگری حاصل کرنے والے گریجویٹس کو پاکستان میں بطور ڈاکٹر پریکٹس کی اجازت نہیں ملے گی، کیونکہ وہ پی ایم ڈی سی کے ساتھ رجسٹریشن کے اہل نہیں ہوں گے۔

کونسل کے مطابق افغانستان کے میڈیکل تعلیمی ادارے ایجوکیشن کمیشن فار فارن میڈیکل گریجویٹس (ECFMG) کی منظور شدہ فہرست میں شامل نہیں ہیں۔ اسی وجہ سے وہاں سے فارغ التحصیل طلبہ پاکستان میں ہونے والے نیشنل رجسٹریشن ایگزام میں بھی شرکت نہیں کر سکیں گے۔

پی ایم ڈی سی نے طلبہ اور والدین کو مشورہ دیا ہے کہ بیرونِ ملک کسی بھی میڈیکل ادارے میں داخلہ لینے سے پہلے متعلقہ ادارے کی ECFMG سے منظوری ضرور چیک کریں، تاکہ مستقبل میں رجسٹریشن اور پیشہ ورانہ پریکٹس کے حوالے سے کسی قسم کی دشواری کا سامنا نہ کرنا پڑے۔