اسلام آباد (نیوز ڈ یسک)جوان نظر آنے کی خواہش ایک 27 سالہ خاتون کے لیے جان لیوا ثابت ہوئی، جب وہ مبینہ طور پر ایک غیر مجاز شخص سے اینٹی ایجنگ انجکشن لگوانے کے بعد زندگی کی بازی ہار گئیں۔

غیر ملکی میڈیا رپورٹس کے مطابق یہ افسوسناک واقعہ امریکی شہر نیویارک میں پیش آیا، جہاں خاتون نے ایک نجی طبی مرکز سے بڑھاپے کے اثرات کم کرنے کے لیے انجکشن لگوایا۔ انجکشن لگنے کے کچھ ہی دیر بعد ان کی طبیعت اچانک بگڑ گئی، جس پر انہیں فوری طور پر ایمبولینس کے ذریعے اسپتال منتقل کیا جا رہا تھا، تاہم وہ راستے ہی میں دم توڑ گئیں۔واقعے کے بعد پولیس نے 55 سالہ لوئس روخاس کیبریرا کو حراست میں لے لیا۔ تفتیش کے دوران اس نے اعتراف کیا کہ اس کے پاس نیویارک ریاست میں بطور ڈاکٹر طب کی پریکٹس کرنے کا قانونی لائسنس موجود نہیں تھا۔حکام کے مطابق ملزم کے خلاف بغیر لائسنس طبی خدمات فراہم کرنے اور لاپروائی کے ذریعے انسانی جان کو خطرے میں ڈالنے کے الزامات عائد کیے گئے ہیں۔

ملزم کو برونکس کی عدالت میں پیش کیا گیا، جہاں عدالت نے پوسٹ مارٹم رپورٹ آنے تک اس کا پاسپورٹ ضبط کرنے کی شرط پر عارضی رہائی دے دی۔عدالتی کارروائی کے دوران کیبریرا نے مؤقف اختیار کیا کہ وہ ڈومینیکن ریپبلک میں لائسنس یافتہ ڈاکٹر ہے، جبکہ پورٹو ریکو میں بھی طبی معاون (میڈیکل اسسٹنٹ) کا لائسنس رکھتا ہے۔ اس کے بقول نیویارک میں میڈیکل لائسنس کے حصول کی درخواست ابھی زیرِ غور ہے۔ملزم نے یہ بھی بتایا کہ اس وقت نیویارک میں اس کے پاس صرف کاسمیٹولوجسٹ (بیوٹیشن) کا لائسنس موجود ہے، جبکہ طبی پریکٹس کی باقاعدہ اجازت حاصل نہیں تھی۔