اسلام آباد (نیوز ڈ یسک) بھارت کی ریاست آندھرا پردیش میں شادی کے نام پر لوگوں کو دھوکہ دینے والی ایک خاتون کو پولیس نے گرفتار کر لیا ہے،

جس پر مختلف افراد سے متعدد شادیاں کرکے مالی فائدہ حاصل کرنے کے الزامات ہیں۔پولیس کے مطابق 27 سالہ خاتون وجرامنی نے مختلف افراد سے پانچ شادیاں کیں اور ہر مرتبہ مالی فوائد حاصل کرنے کے بعد فرار ہو جاتی تھی۔ تازہ ترین مقدمہ اس وقت سامنے آیا جب وہ 2025 میں اننت پور کے رہائشی یاپرلا نامی شخص کو چھوڑ کر تقریباً 3 لاکھ 80 ہزار روپے مالیت کا جہیز لے کر غائب ہو گئی۔بھارتی میڈیا رپورٹس کے مطابق ملزمہ اس دھوکہ دہی کے نیٹ ورک کو اپنے چند ساتھیوں کی مدد سے چلا رہی تھی، جن میں سوما پریا، اشوک، ششی کلا اور رام کرشنا شامل ہیں۔ یہ افراد شادی کے خواہشمند لوگوں کو جھانسہ دے کر جعلی رشتے طے کرواتے اور مالی فائدہ حاصل کرتے تھے۔پولیس حکام کا کہنا ہے کہ ابتدائی تحقیقات میں یہ بھی سامنے آیا ہے کہ ملزمہ سابقہ شادیوں سے دو بچوں کی ماں ہے۔ وہ مختلف افراد کو دھوکہ دینے کے لیے اپنی شناخت بھی تبدیل کرتی رہتی تھی اور شویتا ریڈی اور کیرتی جیسے فرضی نام استعمال کرتی تھی۔رپورٹس کے مطابق ایک متاثرہ شخص سے شادی کے چند روز بعد ہی خاتون نے طبیعت خراب ہونے کا بہانہ بنایا اور والدین کے گھر جانے کی خواہش ظاہر کی۔

سفر کے دوران وہ ایک ریلوے اسٹیشن کے قریب موقع پاکر بھیڑ میں غائب ہوگئی، جس کے بعد شوہر نے اسے تلاش کرنے کی کوشش کی لیکن کامیابی نہ مل سکی۔متاثرہ شخص کی شکایت پر پولیس نے تحقیقات شروع کیں تو خاتون کے متعدد فراڈ کیسز اور اس کے مبینہ نیٹ ورک کا انکشاف ہوا۔ بعد ازاں پولیس نے کارروائی کرتے ہوئے خاتون کو گرفتار کر لیا۔پولیس کے مطابق ملزمہ سے مزید تفتیش جاری ہے اور اس کے دیگر ساتھیوں اور ممکنہ متاثرین کے بارے میں بھی معلومات اکٹھی کی جا رہی ہیں۔