اسلام آباد (نیوز ڈیسک)وفاقی حکومت نے پاکستان پیپلز پارٹی کو وفاقی کابینہ میں شامل ہونے کی باضابطہ پیشکش کر دی ہے،
جبکہ حکومتی حلقوں میں آئندہ دنوں میں اہم سیاسی اور انتظامی تبدیلیوں کی تیاریاں جاری ہیں۔ذرائع کے مطابق اگر پیپلز پارٹی کابینہ کا حصہ بننے پر آمادہ ہو جاتی ہے تو پارٹی چیئرمین بلاول بھٹو زرداری کو کسی اہم وفاقی وزارت کی ذمہ داری سونپی جا سکتی ہے۔اطلاعات ہیں کہ وفاقی بجٹ کی منظوری کے بعد کابینہ میں بڑے پیمانے پر ردوبدل متوقع ہے، جس کے تحت بعض نئے رہنماؤں کو حکومتی ٹیم میں شامل کیے جانے کا امکان ہے۔ذرائع کا کہنا ہے کہ وزیراعظم نے تمام وفاقی وزراء سے ان کی کارکردگی کی تفصیلی رپورٹس طلب کر لی ہیں۔ ان رپورٹس کا جائزہ مکمل ہونے کے بعد مختلف وزارتوں کے قلمدان تبدیل کیے جا سکتے ہیں۔
حکومتی ذرائع کے مطابق تجارت، توانائی، ہاؤسنگ، مواصلات، خزانہ اور خارجہ امور سمیت متعدد اہم شعبوں میں تبدیلیوں پر غور کیا جا رہا ہے۔ اس کے علاوہ وزیراعظم کے چند معاونینِ خصوصی بھی ممکنہ تبدیلیوں کی زد میں آ سکتے ہیں۔ذرائع کے مطابق مجوزہ ردوبدل کا مقصد حکومتی کارکردگی کو مزید مؤثر بنانا اور آئندہ سیاسی و انتظامی اہداف کے حصول کے لیے کابینہ کو ازسرِنو ترتیب دینا ہے۔
