اسلام آباد (نیوز ڈ یسک) ایران اور امریکا کے درمیان مجوزہ مفاہمتی یادداشت (ایم او یو) کی دستخطی تقریب کے سلسلے میں پاکستان کے دفتر خارجہ کی تیاریاں تیز ہو گئی ہیں،
جبکہ انتظامی امور کی نگرانی کے لیے وزارت خارجہ کے اعلیٰ حکام سوئٹزرلینڈ پہنچ چکے ہیں۔سفارتی ذرائع کے مطابق سیکریٹری خارجہ آمنہ بلوچ اپنے وفد کے ہمراہ جنیوا پہنچ گئی ہیں، جہاں وہ تقریب سے متعلق انتظامات اور سفارتی رابطوں کا جائزہ لے رہی ہیں۔ وزارت خارجہ کے دیگر سینئر افسران بھی مختلف مراحل میں سوئٹزرلینڈ روانہ ہو رہے ہیں۔ذرائع کا کہنا ہے کہ وزیراعظم محمد شہباز شریف، فیلڈ مارشل سید عاصم منیر، نائب وزیراعظم و وزیر خارجہ اسحاق ڈار اور وفاقی وزیر اطلاعات عطا اللہ تارڑ کل شام جنیوا پہنچنے کا امکان ہے، جہاں وہ تقریب میں پاکستان کی نمائندگی کریں گے۔رپورٹس کے مطابق اس اہم تقریب میں مشرقِ وسطیٰ اور خطے کے دیگر ممالک کے نمائندے بھی شریک ہوں گے، جن میں قطر، سعودی عرب، مصر اور ترکیہ کے اعلیٰ سطحی وفود شامل ہیں۔
سفارتی حلقوں کا کہنا ہے کہ تقریب کے لیے سیکیورٹی، پروٹوکول اور دیگر انتظامی معاملات کو حتمی شکل دی جا رہی ہے تاکہ بین الاقوامی سطح کے اس اہم پروگرام کو کامیابی سے منعقد کیا جا سکے۔
