اسلام آباد (نیوز ڈ یسک)امریکا اور ایران کے درمیان جاری سفارتی رابطوں میں اہم پیش رفت سامنے آئی ہے،
جہاں دونوں ممالک کے مذاکرات کار ایک ابتدائی مفاہمتی معاہدے پر متفق ہو گئے ہیں۔ تاہم اس معاہدے کو حتمی شکل دینے کے لیے امریکی صدر ڈونلڈ ٹرمپ کی منظوری ابھی باقی ہے۔
بین الاقوامی ویب سائٹ Axios کی رپورٹ کے مطابق فریقین نے 60 روزہ مفاہمت کی ایک یادداشت (MoU) پر اتفاق کیا ہے، جس کے تحت موجودہ جنگ بندی کو مزید توسیع دی جائے گی اور ایران کے جوہری پروگرام سے متعلق باضابطہ مذاکرات کا آغاز کیا جائے گا۔
رپورٹ میں بتایا گیا ہے کہ اس پیش رفت کی تصدیق دو امریکی حکام اور سفارتی ثالثی میں شریک ایک علاقائی ذریعے نے بھی کی ہے۔ ذرائع کے مطابق ابتدائی معاہدے کو حالیہ کشیدگی کے آغاز کے بعد دونوں ممالک کے درمیان سب سے بڑی سفارتی کامیابی قرار دیا جا رہا ہے۔
اگرچہ مفاہمتی یادداشت پر اتفاق ہو چکا ہے، تاہم ایک جامع اور مستقل معاہدے تک پہنچنے کے لیے مزید تفصیلی اور پیچیدہ مذاکرات درکار ہوں گے۔ بالخصوص ایران کے جوہری پروگرام سے متعلق وہ نکات، جن پر امریکی انتظامیہ اور صدر ٹرمپ زور دیتے رہے ہیں، اب بھی زیرِ بحث ہیں۔
تجزیہ کاروں کا کہنا ہے کہ اگر اس مفاہمت کو باضابطہ منظوری مل جاتی ہے تو یہ دونوں ممالک کے درمیان کشیدگی میں کمی اور مستقبل میں وسیع تر سفارتی پیش رفت کی راہ ہموار کر سکتی ہے۔
