اسلام آباد (نیوز ڈیسک) ویسٹ انڈیز کی خواتین کرکٹ ٹیم نے پہلے ٹی 20 انٹرنیشنل میں پاکستان ویمنز کو 8 وکٹوں سے شکست دےکر تین میچوں کی سیریز میں 1-0 کی سبقت حاصل کر لی۔ فاتح ٹیم نے 75 رنز کا ہدف 17 ویں اوور میں 2 وکٹوں کے نقصان پر حاصل کر لیا۔ سینٹ جارج میں کھیلے گئے سیریز کے پہلے میچ میں پاکستان ویمن نے پہلے بیٹنگ کرتے ہوئے مقررہ 20 اوورز میں 9 وکٹوں کے نقصان پر 74 رنز بنائے۔ عالیہ ریاض 16 رنز کے ساتھ ٹاپ سکورر رہیں۔ ویسٹ انڈیز کی جانب سے تریمانے سمارٹ اور دیندرا ڈوٹن نے دو، دو وکٹیں حاصل کیں۔ جواب میں ویسٹ انڈیز ویمن نے ہدف 16.2 اوورز میں 2 وکٹوں کے نقصان پر حاصل کر لیا۔ دیندرا ڈوٹن نے عمدہ بیٹنگ کا مظاہرہ کیا اور 38 رنز کی ناقابل شکست اننگز کھیلی جس پر انہیں کھیل کا بہترین کھلاڑی قرار دیا گیا ۔