اسلام آباد (نیوز ڈیسک) متحدہ عرب امارات میں عیدالاضحیٰ اور یومِ عرفہ کے موقع پر طویل سرکاری تعطیلات کا اعلان کر دیا گیا ہے،
جس کے تحت سرکاری دفاتر، اسکولز اور کئی نجی تعلیمی ادارے متعدد دنوں تک بند رہیں گے۔وفاقی اتھارٹی برائے گورنمنٹ ہیومن ریسورسز کی جانب سے جاری بیان میں کہا گیا ہے کہ سرکاری ملازمین کے لیے چھٹیوں کا آغاز 25 مئی بروز پیر سے ہوگا، جبکہ 29 مئی بروز جمعہ تک تمام سرکاری ادارے بند رہیں گے۔ معمول کی سرکاری سرگرمیاں یکم جون سے دوبارہ شروع کی جائیں گی۔دوسری جانب دبئی میں ذوالحجہ کا چاند دیکھنے کے لیے خصوصی عوامی تقریب منعقد کرنے کا بھی اعلان کیا گیا ہے۔ اسلامی امور اور فلاحی سرگرمیوں کے محکمے کے مطابق یہ تقریب 17 مئی کو جبل نزویٰ ٹریل پر شام 5 بجے سے غروبِ آفتاب تک جاری رہے گی، جہاں شہریوں کی بڑی تعداد کی شرکت متوقع ہے۔فلکیاتی ماہرین کے مطابق ذوالحجہ کا آغاز 18 مئی بروز پیر ہونے کا امکان ہے۔ امارات فلکیاتی سوسائٹی کے چیئرمین ابراہیم الجروان نے بتایا کہ نیا چاند 17 مئی کی رات 12 بج کر ایک منٹ پر پیدا ہوگا، تاہم حتمی اعلان رویتِ ہلال کمیٹی ہی کرے گی۔متوقع قمری تاریخوں کے مطابق یومِ عرفہ 26 مئی بروز منگل جبکہ عیدالاضحیٰ 27 مئی بروز بدھ کو منائے جانے کا امکان ظاہر کیا جا رہا ہے۔
ادھر وزارتِ تعلیم نے بھی تصدیق کی ہے کہ تیسرے تعلیمی ٹرم کی وسط مدتی تعطیلات کو عید کی چھٹیوں کے ساتھ ملا دیا گیا ہے۔ طلبہ، اساتذہ اور تعلیمی عملے کے لیے 25 سے 29 مئی تک تعطیلات ہوں گی، جبکہ تعلیمی سرگرمیوں کا دوبارہ آغاز یکم جون سے ہوگا۔دبئی کے نجی اسکولز بھی اسی شیڈول کے مطابق بند رہیں گے، جبکہ شارجہ پرائیویٹ ایجوکیشن اتھارٹی نے اعلان کیا ہے کہ شارجہ کے نجی تعلیمی ادارے 25 سے 28 مئی تک بند رہیں گے۔ ہفتہ وار تعطیلات شامل ہونے کے بعد شارجہ کے طلبہ کو تقریباً 10 دن کی چھٹیاں ملنے کا امکان ہے۔
