اسلام آباد (نیوز ڈ یسک) چین میں ایک اہم سرکاری تبدیلی سامنے آئی ہے، جہاں سینئر سفارتکار سن ویڈونگ کو اچانک نائب وزیر خارجہ کے عہدے سے ہٹا دیا گیا ہے۔

غیر ملکی میڈیا کے مطابق چین کی وزارت انسانی وسائل نے اپنی ویب سائٹ پر جاری ایک مختصر اعلامیے میں اس فیصلے کی تصدیق کی، تاہم برطرفی کی وجوہات یا وقت کے بارے میں کوئی تفصیل فراہم نہیں کی گئی۔ بیان میں صرف اتنا کہا گیا کہ یہ اقدام اعلیٰ حکومتی سطح پر کیا گیا ہے۔چینی وزارت خارجہ کی ویب سائٹ کے مطابق سن ویڈونگ کی آخری سرگرمیاں 13 مارچ کو سامنے آئیں، جب انہوں نے برونائی اور ملائیشیا کے سفیروں سے ملاقاتیں کیں۔ اس سے قبل وہ پاکستان کے سفیر کے ساتھ بھی دو طرفہ تعلقات کے امور پر گفتگو کر چکے تھے۔دوسری جانب چین میں بدعنوانی کے خلاف کارروائیوں کا سلسلہ بھی جاری ہے۔

گزشتہ برس ایک رپورٹ کے مطابق ایک ملین سے زائد کیسز کی تحقیقات کی گئیں، جبکہ 9 لاکھ 38 ہزار افراد کو مختلف سزائیں دی گئیں۔اعداد و شمار کے مطابق ان کارروائیوں میں 69 اعلیٰ سطح کے حکام، 4155 بیورو سطح کے افسران، 35 ہزار ضلعی اہلکار اور ایک لاکھ 25 ہزار مقامی سطح کے افسران شامل تھے، جو ملک میں احتسابی عمل کی شدت کو ظاہر کرتا ہے۔