تہران (این این آئی)امریکی ناکہ بندی پر چین نے ردِعمل دیتے ہوئے کہا ہے کہ ایرانی بندرگاہوں پر امریکی ناکہ بندی خطرناک اور غیر ذمے دارانہ ہے۔
غیر ملکی خبر رساں ادارے کے مطابق ترجمان چینی وزارتِ خارجہ نے کہا ہے کہ امریکا کی جانب سے فوجی تعیناتی میں اضافہ کشیدگی کو مزید بڑھا دے گا۔ ترجمان کا کہنا تھاکہ مخصوص ناکہ بندی جیسے اقدامات نازک صورتِ حال کو مزید خراب کر سکتے ہیں، یہ اقدام جنگ بندی کمزور کرے گا۔چینی وزارتِ خارجہ کی جانب سے کہا گیا ہے کہ یہ اقدام آبنائے ہرمز میں بحری آمد و رفت کے تحفظ کو بھی خطرے میں ڈالے گا، صرف مکمل جنگ بندی ہی حالات کو بہتر بنا سکتی ہے۔چینی وزارتِ خارجہ کے ترجمان نے کہا ہے کہ موجودہ صورتِ حال اس وقت نازک موڑ پر ہے، چین مشرقِ وسطی میں امن واستحکام کی بحالی کے لیے کوششیں جاری رکھے گا۔چین نے ایران کو ہتھیار فراہم کرنے سے متعلق خبروں کو مسترد کرتے ہوئے کہا ہے کہ ایران کو ہتھیار فراہم کرنے سے متعلق خبریں من گھڑت ہیں۔
