واشنگٹن (این این آئی)امریکی نیوز ویب سائٹ نے امریکی حکام کے حوالے سے دعویٰ کیا ہے کہ امریکی بحریہ کے کئی جنگی جہاز آبنائے ہرمز سے گزرے ہیں۔
ویب سائٹ کے مطابق یہ واقعہ ایران کے ساتھ جنگ کے آغاز کے بعد پہلی بار پیش آیا اور یہ اقدام ایران کے ساتھ کسی قسم کی ہم آہنگی کے بغیرکیا گیا۔ذرائع کے مطابق اس کارروائی کا مقصد تجارتی بحری جہازوں کے لیے اعتماد بڑھانا تھا تاکہ وہ اس راستے سے محفوظ طریقے سے گزر سکیں، یہ اقدام ایسے وقت میں سامنے آیا ہے جب پاکستان میں دونوں فریقین کے درمیان امن مذاکرات شروع ہوئے ہیں ۔ایک امریکی اہلکار نے بتایا کہ یہ آپریشن بین الاقوامی پانیوں میں آزادانہ بحری آمدورفت کو یقینی بنانے کے لیے کیا گیا، اہلکار کے مطابق امریکی بحری جہاز مشرق سے مغرب کی سمت آبنائے ہرمز سے خلیج کی طرف گئے اور پھر واپس اسی راستے سے گزرتے ہوئے بحیرہ عرب کی طرف روانہ ہوئے۔
دوسری جانب ایرانی میڈیا نے دعویٰ کیا کہ امریکی بحری جہاز یواے ای کی فجیرہ بندرگاہ سے آبنائے ہرمز روانہ ہوا تھا لیکن ایرانی فورسز کی دھمکی پر امریکی جنگی بحری جہاز واپس لوٹ گیا۔ایرانی میڈیا کے مطابق ایرانی فوج نے اسلام آباد میں وفدکو امریکی جنگی جہاز کی پیش قدمی سے آگاہ کر دیا تھا اور ایران نیثالث کو جنگی جہازکو آگے بڑھنے کی صورت میں نشانہ بنانے کے فیصلے سے بھی آگاہ کردیا تھا تاہم امریکی حکام نے کہا کہ انہیں ایسی کوئی باضابطہ وارننگ موصول نہیں ہوئی۔
