اسلام آباد (این این آئی)اسلام آباد میں گزشتہ سال قتل کی جانے والی ٹک ٹاکر ثنا یوسف کی والدہ بیٹی کے انصاف کیلئے آبدیدہ ہوگئیں۔

سوشل میڈیا پر ثنا یوسف کی والدہ کی ایک ویڈیو وائرل ہورہی ہے جس میں انہوں نے کہا کہ کتنی بار میں نے خودکشی کرنے کی کوشش کی، مجھے اپنی بیٹی کے بغیر نہیں رہنا، میری ایک ہی بیٹی تھی اور وہ بہت بہادر تھی۔انہوں نے کہا کہ میں روز مرتی ہوں اور روز جیتی ہوں، میں ہر جگہ اپنی بیٹی کے ساتھ ہوتی تھی، 8 ماہ ہوگئے ہیں، ایک سال ہونے والا ہے ابھی تک میری بیٹی کو انصاف نہیں ملا۔انہوںنے کہاکہ میں انصاف چاہتی ہوں، مجرم کو سخت سزا ملے، میری بیٹی کا قصور یہ تھا کہ اس نے مجرم کو ملنے سے منع کردیا تھا، میں چاہتی ہوں کہ انصاف ملے تاکہ باقی لڑکیوں کو بھی امید ہو کہ ثنا کے ساتھ ہمیں بھی انصاف مل سکتا ہے۔واضح رہے 2 جون کو اسلام آباد میں ٹک ٹاکر ثنا یوسف کو ان کے گھر پر عمر حیات عرف کاکا نامی ملزم نے فائرنگ کرکے قتل کردیا تھا۔