بیجنگ (نیوز ڈیسک) لبنان میں اسرائیلی کارروائیوں پر چین نے شدید ردِعمل دیتے ہوئے زور دیا ہے کہ لبنان کی خودمختاری اور سلامتی کا ہر صورت احترام کیا جانا چاہیے۔
بین الاقوامی میڈیا کے مطابق چینی وزارتِ خارجہ کے ترجمان نے اپنے بیان میں کہا کہ لبنان کے عوام کے جان و مال کا تحفظ یقینی بنانا ضروری ہے اور کسی بھی قسم کی خلاف ورزی قابلِ قبول نہیں ہونی چاہیے۔ترجمان نے مزید کہا کہ چین تمام متعلقہ فریقین سے اپیل کرتا ہے کہ وہ صبر و تحمل کا مظاہرہ کریں اور خطے میں بڑھتی ہوئی کشیدگی کو کم کرنے کے لیے فوری اقدامات کریں۔دوسری جانب لبنان کے خلاف اسرائیلی حملوں پر پاکستان نے بھی سخت مذمت کی ہے۔ دفتر خارجہ کے ترجمان طاہر اندرابی کا کہنا ہے کہ ان حملوں کے نتیجے میں قیمتی جانوں کا نقصان اور بنیادی ڈھانچے کی بڑے پیمانے پر تباہی باعثِ تشویش ہے۔
انہوں نے کہا کہ اسرائیل کے اقدامات خطے میں امن اور استحکام کی کوششوں کو متاثر کر رہے ہیں۔
