بیرت(این این آئی)اسرائیلی فوج کی جانب سے ایران جنگ بندی نافذ ہونے کے باوجود لبنان پر شدید ترین فضائی حملے کیے گئے ۔

لبنان سول ڈیفنس کے مطابق ملک بھر میں اسرائیلی حملوں کے نتیجے میں ہلاکتوں کی تعداد بڑھ کر 254ہو گئی ہے جبکہ 1165افراد زخمی ہوئے ہیں۔سول ڈیفنس کی جانب سے جاری اعداد و شمار کے مطابق بیروت میں 92افراد جاں بحق اور 742زخمی ہوئے، بیروت کے جنوبی مضافاتی علاقوں میں 61افراد ہلاک اور 200زخمی ہوئے، بعلبک میں 18افراد جاں بحق اور 28زخمی ہوئے، ہرمل میں 9افراد ہلاک اور 6زخمی ہوئے، نباتیہ میں 28افراد جاں بحق اور 59زخمی ہوئے، عالیہ ضلع میں 17افراد ہلاک اور 6زخمی ہوئے، صیدا میں 12افراد جاں بحق اور 56زخمی ہوئے جبکہ صور میں 17افراد ہلاک اور 68زخمی ہوئے۔حکام کے مطابق امدادی کارروائیاں جاری ہیں اور ہلاکتوں میں مزید اضافے کا خدشہ ظاہر کیا جا رہا ہے۔لبنانی وزارت صحت کے مطابق بدھ کوہونے والے اسرائیلی حملوں میں لبنان میں 112افراد جاں بحق اور 800 سے زائد زخمی ہوئے۔غیر ملکی خبررساں ایجنسی کے مطابق بیروت میں مسلسل دھماکوں سے شہر گونج اٹھا اور دارالحکومت کے مختلف علاقوں سے دھوئیں کے بادل اٹھتے دیکھے گئے۔

اسرائیلی فوج کے مطابق جنگ کے دوران اب تک کی سب سے بڑی اور مربوط کارروائی میں بیروت، وادی بقاع اور جنوبی لبنان میں حزب اللہ کے 100سے زائد کمانڈ سینٹرز اور فوجی مقامات کو نشانہ بنایا گیا۔لبنان کی وزارت صحت کے مطابق بدھ کو حملوں میں درجنوں افراد ہلاک اور سیکڑوں زخمی ہوئے۔ حملوں کے بعد اسپتالوں میں ایمرجنسی نافذ کردی گئی جبکہ عوام سے خون کے عطیات دینے کی بیھ اپیل کی گئی۔اسرائیلی وزیراعظم بنیامین نیتن یاہو نے کہا کہ ایران کے ساتھ جاری جنگ بندی لبنان پر لاگو نہیں ہوتی جبکہ اسرائیلی وزیر دفاع اسرائیل کاٹز کے مطابق ان حملوں میں حزب اللہ کو بڑا نقصان پہنچایا گیا۔