اسلام آباد (نیوز ڈیسک) سعودی عرب نے ایران اور امریکا کے درمیان ہونے والی جنگ بندی کا خیرمقدم کرتے ہوئے خطے میں امن کے قیام کے لیے پاکستان کی سفارتی کاوشوں کو سراہا ہے۔

سعودی وزارت خارجہ کی جانب سے جاری بیان میں کہا گیا کہ امریکی صدر ڈونلڈ ٹرمپ اور پاکستانی وزیراعظم شہباز شریف کی جانب سے سامنے آنے والے جنگ بندی کے اعلان کو مثبت پیش رفت قرار دیا جاتا ہے۔بیان میں مزید کہا گیا کہ پاکستانی قیادت، خصوصاً وزیراعظم اور فیلڈ مارشل کی مؤثر سفارتی کوششوں نے اس اہم پیش رفت کو ممکن بنایا، جس پر سعودی عرب انہیں خراج تحسین پیش کرتا ہے۔ سعودی حکام نے امید ظاہر کی کہ یہ قدم خطے میں پائیدار امن اور استحکام کا پیش خیمہ ثابت ہوگا۔

واضح رہے کہ پاکستان کی ثالثی کے نتیجے میں ایران اور امریکا کے درمیان 15 روزہ جنگ بندی طے پائی ہے، جس کے تحت امریکا نے حملے روک دیے ہیں جبکہ ایران نے آبنائے ہرمز کو بحری آمدورفت کے لیے کھول دیا ہے۔ اس پیش رفت کو عالمی سطح پر مثبت انداز میں دیکھا جا رہا ہے۔