اسلام آباد(نیوز ڈ یسک) ایمریٹس ایئرلائنز نے اعلان کیا ہے کہ ایرانی شہریوں کو متحدہ عرب امارات کے راستے ٹرانزٹ کی سہولت فراہم نہیں کی جائے گی،
جس کے بعد سفر کرنے والوں کو مشکلات کا سامنا کرنا پڑ سکتا ہے۔میڈیا رپورٹس کے مطابق فلائی دبئی نے وضاحت کی ہے کہ یہ پابندی تمام ایرانی مسافروں پر لاگو ہوگی، تاہم وہ افراد مستثنیٰ ہوں گے جن کے پاس یو اے ای کا گولڈن ویزا موجود ہے۔اطلاعات کے مطابق خطے میں کشیدگی کے بعد بڑی تعداد میں ایرانی شہری دبئی سے اپنے وطن واپس جا چکے ہیں، اور اب تک 1200 سے زائد افراد واپسی اختیار کر چکے ہیں۔براہِ راست پروازوں کی معطلی کے باعث ایرانی شہریوں کو وطن واپسی کے لیے متبادل راستے اختیار کرنا پڑ رہے ہیں،
جن میں افغانستان اور آرمینیا شامل ہیں۔دوسری جانب ایران نے یو اے ای حکام سے درخواست کی ہے کہ اس کے شہریوں کی واپسی کے لیے سمندری راستوں اور خصوصی فضائی کوریڈور کی سہولت فراہم کی جائے تاکہ پھنسے ہوئے افراد کو محفوظ طریقے سے نکالا جا سکے۔یہ پابندیاں ایران اور خلیجی ممالک کے درمیان بڑھتی ہوئی کشیدگی کے پس منظر میں نافذ کی گئی ہیں، جس کے باعث خطے میں سفری سرگرمیاں متاثر ہو رہی ہیں۔
