اسلام آباد / برلن (نیوز ڈیسک) جرمنی کے وزیر خارجہ یوہان واڈے فیہول نے انکشاف کیا ہے کہ امریکا اور ایران کے نمائندوں کے درمیان جلد پاکستان میں ایک اہم ملاقات متوقع ہے،
جس کا مقصد دونوں ممالک کے درمیان تناؤ میں کمی لانا اور مذاکراتی عمل کو آگے بڑھانا ہے۔جرمن ریڈیو کو دیے گئے ایک انٹرویو میں انہوں نے بتایا کہ اب تک امریکا اور ایران کے درمیان رابطے بالواسطہ طور پر ہوتے رہے ہیں، تاہم اب براہ راست بات چیت کے لیے تیاری مکمل کر لی گئی ہے اور اس سلسلے میں پاکستان کو میزبان کے طور پر دیکھا جا رہا ہے۔یہ پیش رفت ایسے وقت میں سامنے آئی ہے جب اسٹیو وٹکوف بھی اس بات کی نشاندہی کر چکے ہیں کہ پاکستان دونوں ممالک کے درمیان رابطے اور ثالثی میں اہم کردار ادا کر رہا ہے، اور اس کے ذریعے مثبت پیغامات کا تبادلہ ہوا ہے۔
دوسری جانب اسحاق ڈاراور عطا تارڑ نے بھی اس امر کی تصدیق کی ہے کہ پاکستان خطے میں کشیدگی کم کرنے کے لیے فعال سفارتی کوششیں جاری رکھے ہوئے ہے اور امریکا و ایران کے درمیان مذاکرات کی راہ ہموار کرنے میں مصروف ہے۔تجزیہ کاروں کا کہنا ہے کہ اگر یہ ملاقات کامیاب رہی تو اس کے نتیجے میں نہ صرف خطے میں حالات بہتر ہو سکتے ہیں بلکہ عالمی سطح پر پاکستان کا سفارتی کردار بھی مزید مستحکم ہو گا۔
