اسلام آباد (نیوز ڈیسک)متحدہ عرب امارات نے موجودہ علاقائی صورتحال کے تناظر میں اپنے اتحادیوں کے کردار سے متعلق وضاحت کی ضرورت پر زور دیا ہے۔
تفصیلات کے مطابق یو اے ای کے صدارتی مشیر انور قرقاش نے ایک بیان میں کہا کہ امارات کو اس وقت ہتھیاروں یا فوجی کمک سے زیادہ اس بات کی وضاحت درکار ہے کہ مشکل حالات میں کن ممالک پر حقیقی طور پر بھروسہ کیا جا سکتا ہے۔انہوں نے کہا کہ ایران سے متعلق کشیدگی کے آغاز کے بعد سے دوست اور برادر ممالک مسلسل رابطے میں رہے، تاہم کچھ ممالک نے عملی تعاون فراہم کیا جبکہ بعض نے صرف بیانات تک خود کو محدود رکھا۔انور قرقاش کا کہنا تھا کہ متحدہ عرب امارات نے ہر مشکل صورتحال میں اپنی مضبوطی اور استقامت کا مظاہرہ کیا ہے، لیکن اب اسے اس بات کا جائزہ لینا ہے کہ کون سے اتحادی عملی طور پر ساتھ کھڑے ہوتے ہیں۔
