واشنگٹن (نیوز ڈیسک) ایران سے متعلق کشیدگی کے خاتمے کے لیے روسی صدر کی جانب سے دی جانے والی ایک اہم تجویز کو امریکا نے مسترد کر دیا ہے، جس کی تفصیلات اب سامنے آ گئی ہیں۔
میڈیا رپورٹس کے مطابق روس کے صدر ولادیمیر پیوٹن نے تجویز دی تھی کہ ایران کا افزودہ یورینیم روس منتقل کر دیا جائے۔ یہ پیشکش ایران کے خلاف جاری تنازع کو ختم کرنے کے ممکنہ معاہدے کا حصہ بتائی جا رہی تھی۔اطلاعات کے مطابق روسی صدر نے یہ تجویز حالیہ دنوں میں امریکی صدر ڈونلڈ ٹرمپ کے ساتھ ہونے والی ایک ٹیلی فون گفتگو کے دوران پیش کی۔ دونوں رہنماؤں کے درمیان یہ رابطہ خطے میں بڑھتی کشیدگی کے تناظر میں کیا گیا تھا۔
امریکی میڈیا کا کہنا ہے کہ امریکا نے روس کی اس تجویز کو قبول کرنے سے انکار کر دیا۔ رپورٹ میں یہ بھی بتایا گیا ہے کہ روس اس سے پہلے بھی ایران کے افزودہ یورینیم کو اپنی تحویل میں لینے کی پیشکش کر چکا ہے، تاہم امریکا نے اس آپشن کو پہلے بھی تسلیم نہیں کیا تھا۔
