اسلام آباد(نیوز ڈ یسک)ایران کے ساتھ حالیہ جنگی صورتحال کے بعد صدر محمد بن زاید النہیان کا عوام کے نام پہلا بیان سامنے آ گیا ہے۔
اماراتی میڈیا کے مطابق صدر محمد بن زاید ابوظبی کے ایک اسپتال میں جنگ کے دوران زخمی ہونے والوں کی عیادت کے لیے گئے، جہاں انہوں نے اماراتی ٹی وی سے گفتگو کرتے ہوئے کہا کہ ملک اس وقت جنگی حالات سے گزر رہا ہے اور وہ اپنی سرزمین، عوام اور یہاں مقیم تمام افراد کے تحفظ کے لیے اپنی ذمہ داریاں پوری کریں گے۔انہوں نے کہا کہ متحدہ عرب امارات کمزور ملک نہیں بلکہ مضبوط ارادوں اور طاقت کا حامل ہے۔ ان کا کہنا تھا کہ دبئی سمیت ملک کی تمام سات ریاستوں میں رہنے والے ہر فرد کی سلامتی کو یقینی بنایا جائے گا۔صدر نے اس موقع پر مسلح افواج، سکیورٹی اداروں اور دیگر قومی اداروں کی خدمات کو سراہتے ہوئے ان کا شکریہ ادا کیا، جبکہ ملک سے وفاداری اور محبت کا اظہار کرنے والے شہریوں اور غیر ملکی رہائشیوں کی بھی تعریف کی۔
دوسری جانب اماراتی وزارت داخلہ نے سوشل میڈیا پر جاری بیان میں کہا ہے کہ ملک کا فضائی دفاعی نظام میزائل خطرات کا مؤثر جواب دے رہا ہے۔ وزارتِ داخلہ نے عوام سے اپیل کی ہے کہ وہ محفوظ مقامات پر رہیں اور سرکاری ویب سائٹس پر جاری کردہ حفاظتی ہدایات پر عمل کریں۔
