اسلام آباد(نیوز ڈیسک)ایرانی فوج نے امریکا کو سخت پیغام دیتے ہوئے صدر ڈونلڈ ٹرمپ کو چیلنج کیا ہے کہ اگر ہمت ہے تو امریکی بحری جہاز آبنائے ہرمز سے گزار کر دکھائیں۔
ایران کا کہنا ہے کہ آبنائے ہرمز سے صرف امریکا اور اسرائیل کے جہازوں کے گزرنے پر پابندی عائد کی گئی ہے، جبکہ دیگر ممالک کے لیے یہ راستہ بدستور کھلا ہے۔ یہی سمندری گزرگاہ عالمی سطح پر تیل کی ترسیل کے لیے انتہائی اہم سمجھی جاتی ہے۔دوسری جانب امریکی صدر ڈونلڈ ٹرمپ نے منگل کے روز بیان دیا تھا کہ اگر ضرورت پیش آئی تو امریکی بحریہ آبنائے ہرمز کے راستے آئل ٹینکرز کو محفوظ طریقے سے گزارنے کا انتظام کر سکتی ہے۔ایران اور اسرائیل کے درمیان جاری کشیدگی کے باعث دنیا کی اہم ترین سمندری گزرگاہ آبنائے ہرمز کی بندش سے عالمی معیشت پر منفی اثرات پڑ رہے ہیں۔ چین اور بھارت سمیت کئی ممالک میں پیٹرولیم مصنوعات کی قیمتوں میں مسلسل اضافہ دیکھا جا رہا ہے۔ ماہرین کے مطابق پاکستان کو بھی تیل کی درآمدات کا تقریباً 90 فیصد متاثر ہونے کا خدشہ ہے۔
