اسلام آباد (نیوز ڈیسک) ایران پر امریکا اور اسرائیل کے حالیہ حملوں کے بعد ایرانی صدر کا پہلا ردعمل سامنے آ گیا ہے۔
صدر مسعود پزشکیان نے اپنے بیان میں کہا ہے کہ ایران انتقام کو اپنا قانونی اور اخلاقی حق سمجھتا ہے اور اس ذمہ داری کو پورا کرنے کے لیے ہر ممکن اقدام کیا جائے گا۔ انہوں نے آیت اللہ خامنہ ای کی شہادت کو مسلمانوں کے خلاف کھلی جنگ قرار دیتے ہوئے کہا کہ یہ واقعہ نہایت سنگین نتائج کا حامل ہے۔دوسری جانب ایرانی وزیر خارجہ عباس عراقچی نے سپریم لیڈر کی وفات پر تعزیتی پیغام جاری کیا۔ انہوں نے کہا کہ آیت اللہ خامنہ ای عزم و استقلال کی علامت، دور اندیش قیادت کے حامل اور حق کے راستے پر ثابت قدم رہنے والی شخصیت تھے۔
عباس عراقچی کے مطابق مرحوم رہنما نے عزت، حکمت اور مزاحمت کی ایک ایسی میراث چھوڑی ہے جو ہمیشہ زندہ رہے گی۔ انہوں نے مزید کہا کہ اس عظیم سانحے سے قوم کو گہرا صدمہ پہنچا ہے، تاہم جس پرچم کو آیت اللہ خامنہ ای نے بلند کیا، اسے مزید مضبوطی اور بلندی تک پہنچایا جائے گا۔
