اسلام آباد (نیوز ڈ یسک) ظہران ممدانی نے ایران پر امریکا اور اسرائیل کی جانب سے کیے گئے حملوں کو غیر قانونی جارحیت قرار دیتے ہوئے واضح کیا ہے کہ جنگ کسی بھی صورت قابلِ قبول نہیں ہو سکتی۔

سوشل میڈیا پر جاری اپنے بیان میں انہوں نے امریکی کارروائیوں کو سخت تنقید کا نشانہ بنایا اور کہا کہ ایران کے خلاف فوجی اقدامات ایک غیر قانونی جنگ کو مزید خطرناک مرحلے میں داخل کرنے کے مترادف ہیں۔ ان کے مطابق یہ پیش رفت خطے میں کشیدگی کو بے قابو کرنے کا باعث بن سکتی ہے۔انہوں نے کہا کہ شہری علاقوں پر بمباری اور بے گناہ افراد کی ہلاکتیں ایک نئے محاذ کو جنم دے رہی ہیں، جبکہ امریکی عوام مزید جنگ کے بجائے امن کو ترجیح دیتے ہیں۔ ان کا کہنا تھا کہ لوگوں کی خواہش حکومتوں کی تبدیلی کے لیے نئی جنگ نہیں بلکہ عالمی استحکام اور سکون ہے۔میئر نے New York City میں سکیورٹی مزید سخت کرنے کا اعلان بھی کیا۔ انہوں نے بتایا کہ وہ پولیس کمشنر اور ایمرجنسی مینجمنٹ حکام سے مسلسل رابطے میں ہیں، جبکہ حساس مقامات پر گشت بڑھا دی گئی ہے۔ ان کا کہنا تھا کہ ایرانی نژاد امریکی شہری شہر کا اہم حصہ ہیں اور ان کی حفاظت ہر صورت یقینی بنائی جائے گی۔