اسلام آباد (نیوز ڈ یسک) امریکا نے پاکستان میں سکیورٹی صورتحال کے پیش نظر نئی ایڈوائزری جاری کرتے ہوئے اپنے شہریوں کو محتاط رہنے کی ہدایت کی ہے۔
اس اعلامیے میں خاص طور پر قانون نافذ کرنے والے اداروں کے دفاتر، فوجی تنصیبات اور بڑے کاروباری مراکز کے قریب جانے سے گریز کا مشورہ دیا گیا ہے۔یہ ہدایات پاکستان اور افغانستان کے درمیان بڑھتی ہوئی سرحدی کشیدگی اور حالیہ فوجی کارروائیوں کے تناظر میں جاری کی گئی ہیں۔ امریکی مشن نے اپنے شہریوں کو تاکید کی ہے کہ وہ موجودہ حالات میں غیر ضروری نقل و حرکت محدود رکھیں اور ممکنہ خطرناک مقامات سے دور رہیں، کیونکہ ایسے مقامات شدت پسند تنظیموں کے نشانے پر آ سکتے ہیں۔
علاوہ ازیں، افغانستان کے سفر سے متعلق سابقہ ہدایات بھی برقرار رکھی گئی ہیں اور شہریوں کو وہاں جانے سے سختی سے منع کیا گیا ہے۔یہ سکیورٹی الرٹ ایسے وقت میں سامنے آیا ہے جب پاک-افغان سرحد پر حالات کشیدہ ہیں اور پاکستانی فوج کی جانب سے جاری “آپریشن غضبِ للحق” کے باعث خطے میں سکیورٹی خدشات بڑھ گئے ہیں۔
