اسلام آباد (نیوز ڈیسک)   معروف کامیڈین اور میزبان تابش ہاشمی کے ٹی وی پروگرام کی ایک ویڈیو سوشل میڈیا پر تیزی سے گردش کر رہی ہے

جس میں بطور مہمان شریک اداکارہ زارا نور عباس ایک سوال پر جذباتی ہو کر پروگرام ادھورا چھوڑ دیتی ہیں۔وائرل کلپ میں دیکھا جا سکتا ہے کہ دورانِ گفتگو میزبان نے اداکارہ سے ان کے ڈرامے زیبائش کے حوالے سے سوال کیا اور بتایا کہ اس پروجیکٹ کے بعد انہیں عالمی سطح پر پہچان ملی تھی۔ اسی سلسلے میں انہوں نے بھارتی گلوکار Yo Yo Honey Singh کے ایک مبینہ ٹوئٹ کا ذکر کرتے ہوئے پوچھا کہ اس میں کیا کہا گیا تھا۔

سوال سنتے ہی زارا نور عباس سنجیدہ اور خاموش ہو گئیں جبکہ میزبان نے ہنستے ہوئے انہیں بات جاری رکھنے کا کہا۔ کچھ توقف کے بعد اداکارہ نے مختصر جواب دیتے ہوئے کہا کہ گلوکار نے ان کے کام پر تبصرہ کیا تھا جو ان کے نزدیک اتنا مزاحیہ نہیں تھا جتنا سمجھا گیا۔میزبان کی جانب سے مزید وضاحت طلب کرنے پر اداکارہ نے گفتگو آگے بڑھانے سے انکار کرتے ہوئے کہا کہ وہ اس موضوع پر بات نہیں کرنا چاہتیں اور پہلے ہی درخواست کر چکی تھیں کہ اس معاملے کو زیرِ بحث نہ لایا جائے۔ اس موقع پر میزبان نے وضاحت دی کہ انہیں اس بات کا علم نہیں تھا اور ضرورت پڑی تو اس حصے کو ایڈیٹ کر دیا جائے گا۔

تاہم گفتگو کے دوران اچانک اداکارہ آبدیدہ ہو گئیں اور چند لمحوں بعد شو ادھورا چھوڑ کر چلی گئیں۔ ویڈیو منظرِ عام پر آنے کے بعد سوشل میڈیا صارفین مختلف آرا کا اظہار کر رہے ہیں۔ کچھ افراد اسے حقیقی ردِعمل قرار دے رہے ہیں جبکہ بعض کا خیال ہے کہ یہ سب ریٹنگ یا تشہیر کا حصہ بھی ہو سکتا ہے۔ تاہم اس واقعے کی مکمل حقیقت تاحال واضح نہیں ہو سکی۔

پروگرام میں ایسا کیا ہوا کہ زارا نور عباس رونے لگ گئی اور آخر میں پروگرام چھوڑ کر چل پڑیں؟۔۔ pic.twitter.com/ZbtqJvjUtT

— Nadir Baloch (@BalochNadir5) February 24, 2026