اسلام آباد (نیوز ڈیسک) ایک رکشہ ڈرائیور، جس پر خاتون کو ہراساں کرنے کا الزام تھا، اُس وقت زخمی ہو گیا جب اس کے کپڑوں میں چھپی پستول اچانک چل گئی۔
سیف سٹی ترجمان کے مطابق خاتون نے ہراسگی کی شکایت پبلک سیفٹی ایپ کے ذریعے درج کروائی، جس پر کارروائی کرتے ہوئے ٹیم نے جدید کیمروں کی مدد سے صرف آدھے گھنٹے میں رکشے کی نشاندہی کر لی۔ بعد ازاں کیمرا ریکارڈنگ کی بنیاد پر ملزم کو گرفتار کر کے اس کے خلاف مقدمہ درج کر لیا گیا۔سی سی ڈی کی جانب سے جاری ویڈیو بیان میں ملزم نے اعتراف کیا کہ وہ اکثر رکشے میں سوار خواتین کے ساتھ نامناسب رویہ اختیار کرتا تھا۔ اس نے بتایا کہ گرفتاری سے بچنے کے لیے وہ فرار ہونے کی کوشش کر رہا تھا اور دیوار پھلانگتے وقت اس کے نیفے میں رکھی پستول چل گئی، جس سے وہ خود ہی زخمی ہو گیا۔ مزید یہ کہ ملزم نے اپنے بیان میں کہا کہ جس چیز نے اسے پریشان کر رکھا تھا وہ اب ختم ہو چکی ہے۔
