اسلام آباد (نیوز ڈیسک) سعودی عرب کے دارالحکومت ریاض میں جاری ورلڈ ڈیفنس شو 2026 کے دوران پاکستانی کمپنی گلوبل انڈسٹریل اینڈ ڈیفنس سلوشنز (جی آئی ڈی ایس) نے ہائپرسونک اینٹی شپ بیلسٹک میزائل ’سمیش‘ (SMASH) متعارف کروا دیا ہے۔

یہ جدید میزائل نہ صرف سمندری اہداف بلکہ زمینی اہداف پر حملہ کرنے کی صلاحیت بھی رکھتا ہے۔ کمپنی کے مطابق اسمیش میزائل کو انتہائی تیز رفتار، اعلیٰ درستگی اور تقریباً عمودی زاویے سے حملہ کرنے کے لیے ڈیزائن کیا گیا ہے، تاکہ جدید دفاعی نظام کو چکمہ دیا جا سکے۔ اینٹی شپ سیٹنگ میں اس کی رینج 290 کلومیٹر ہے اور اس میں 384 کلوگرام وزنی وار ہیڈ نصب کیا گیا ہے۔ نیویگیشن کے لیے ایچ ڈی جی این ایس اسسٹڈ اینرشیل نیویگیشن سسٹم کے ساتھ ایکٹو ریڈار سِیکر استعمال کیا گیا ہے۔ میزائل میں سنگل اسٹیج ڈوئل تھرسٹ سالڈ راکٹ موٹر نصب ہے، اور کمپنی کے مطابق اس کی درستگی (CEP) 10 میٹر یا اس سے کم ہے۔ ٹرمینل فیز میں اس کی رفتار آواز کی رفتار سے دوگنی تک پہنچ سکتی ہے۔

زمینی اہداف کے لیے تیار شدہ ورژن میں بھی رینج 290 کلومیٹر ہے، تاہم وار ہیڈ کا وزن 444 کلوگرام کیا گیا ہے۔ اس میں بھی وہی سنگل اسٹیج ڈوئل تھرسٹ راکٹ موٹر استعمال کی گئی ہے جبکہ درستگی 15 میٹر یا اس سے کم اور رفتار آواز کی رفتار سے دوگنی بتائی گئی ہے۔

جی آئی ڈی ایس کا کہنا ہے کہ اسمیش میزائل کو دوہری صلاحیت کے لیے ڈیزائن کیا گیا ہے تاکہ ایک ہی میزائل کو سمندری اور زمینی دونوں مشنز میں استعمال کیا جا سکے۔ اس سے لاجسٹک نظام آسان رہتا ہے اور اخراجات میں کمی آتی ہے۔ دفاعی ماہرین کے مطابق مشرق وسطیٰ اور دیگر خطوں میں طویل فاصلے تک درست حملہ کرنے والے ہتھیاروں کی بڑھتی ہوئی طلب کے پیش نظر اسمیش کو انتہائی مؤثر اور متنازع ہتھیار کے طور پر پیش کیا جا رہا ہے۔