اسلام آباد(نیوز ڈیسک)حکومت سندھ نے اہم پیش رفت کرتے ہوئے محکمہ داخلہ کی جانب سے ایم پی او کے تحت جاری کیے گئے تمام نظربندی احکامات ختم کرنے کا فیصلہ کر لیا ہے۔
اس حوالے سے باضابطہ نوٹیفکیشن بھی جاری کر دیا گیا ہے۔اعلامیے کے مطابق یکم سے 9 فروری 2026 کے درمیان ایم پی او آرڈیننس 1960 کے تحت کیے گئے تمام حراستی احکامات فوری طور پر کالعدم قرار دے دیے گئے ہیں۔ اس اقدام کے بعد ایم پی او کے تحت زیرِ حراست پی ٹی آئی کے کارکنان اور رہنماؤں کی رہائی کی راہ ہموار ہو گئی ہے۔محکمہ داخلہ نے سینٹرل جیل کراچی اور ڈسٹرکٹ جیل ملیر کی انتظامیہ کو ہدایت جاری کی ہے کہ متعلقہ افراد کو فوری رہا کیا جائے۔ تاہم یہ وضاحت بھی کی گئی ہے کہ وہی قیدی رہا ہوں گے جو کسی اور مقدمے میں پولیس کو مطلوب نہ ہوں۔نوٹیفکیشن میں متعلقہ حکام کو فوری عملدرآمد کا پابند بنایا گیا ہے۔
اس سلسلے میں آئی جی سندھ، جیل سپرنٹنڈنٹس، کمشنر کراچی اور دیگر ضلعی افسران کو بھی فیصلے کی کاپیاں بھجوا دی گئی ہیں تاکہ کسی قسم کی قانونی یا انتظامی رکاوٹ کے بغیر احکامات پر عمل یقینی بنایا جا سکے۔
