اسلام آباد (این این آئی)بھارت کی آبی جارحیت جاری، مودی نے مقبوضہ کشمیر میں ایک اور ڈیم بنانے کا اعلان کر دیا۔
ذرائع کے مطابق بھارت نے چناب دریا پر 5ہزار 129کروڑ روپے مالیت کے ساوالکوٹ میگا ڈیم منصوبے پر کام شروع کر دیا، این ایچ پی سی نے ساوالکوٹ ہائیڈرو الیکٹرک منصوبے کی تعمیر کیلئے بولیاں طلب کر لیں۔منصوبے کے پہلے مرحلے میں 1ہزار 406اور دوسرے مرحلے میں 450میگاواٹ بجلی پیدا ہوگی، ساوالکوٹ منصوبہ بگلیہار اور سلال منصوبوں کے درمیان چناب دریا پر واقع منصوبہ رن آف دی ریور بنیاد پر تعمیر کیا جائے گا۔
ماہرین کے مطابق چناب انڈس بیسن کا حصہ اور پاکستان کے لیے نہایت اہم دریا ہے، پاکستان کی 90فیصد زراعت انڈس بیسن کے پانی پر انحصار کرتی ہے۔واضح رہے کہ پہلگام حملے کے بعد بھارت نے انڈس واٹر ٹریٹی کی تمام کارروائیوں سے کنارہ کشی اختیار کر لی ہے ۔
