اسلام آباد (نیوز ڈ یسک) اسلام آباد میں ہونے والے خودکش حملے کے حوالے سے سیکیورٹی اداروں نے بڑی کامیابی حاصل کرتے ہوئے

دہشتگردی کی منصوبہ بندی کرنے والے افغان ماسٹر مائنڈ کو گرفتار کر لیا ہے۔سیکیورٹی ذرائع کے مطابق ترلائی کلاں میں پیش آنے والے خودکش دھماکے کی تفتیش کے دوران انٹیلیجنس معلومات کی بنیاد پر پشاور اور نوشہرہ میں مختلف مقامات پر کارروائیاں کی گئیں، جن کے نتیجے میں اہم گرفتاریاں عمل میں آئیں۔ذرائع کا کہنا ہے کہ یہ آپریشنز جدید ٹیکنیکل ذرائع اور ہیومن انٹیلیجنس کی مدد سے کیے گئے، جن میں خودکش حملہ آور کے چار سہولت کاروں کو حراست میں لیا گیا ہے۔سیکیورٹی حکام کے مطابق اسلام آباد حملے کا مرکزی منصوبہ ساز ایک افغان شہری تھا، جس کا تعلق کالعدم تنظیم داعش سے بتایا جاتا ہے، اور اسے بھی گرفتار کر لیا گیا ہے۔

واضح رہے کہ گزشتہ روز اسلام آباد کے علاقے ترلائی میں واقع امام بارگاہ اور مسجد خدیجۃ الکبریٰ میں ہونے والے خودکش دھماکے میں 33 افراد شہید جبکہ 150 سے زائد زخمی ہو گئے تھے۔