اسلام آباد(نیوز ڈیسک )امریکا کے ایک چڑیا گھر میں پیدا ہونیوالے سرخ پانڈا کے دو بچے اپنی پیدائش کے چار ماہ بعد پہلی بار عوام کے سامنے پیش کر دئیے گئے۔ایڈیسن اور کلارک نامی پانڈا بچے گزشتہ روز پہلی بار کوولر لائن ہاﺅس میں اپنی ماں کیساتھ غار سے باہر آئے اور خوب کھیل کود کی اور کافی دیر تک اِردگرد کے ماحول، گھاس اور درختوں کا جائزہ لیتے رہے۔چڑیا گھر میں موجود افراد ان کی اٹھکیلیوں سے خوب محظوظ ہوئے۔26 جون کو پیدا ہونیوالے یہ بچے چڑیا گھر انتظامیہ کی زیر نگرانی ہیں جو ان کی تمام تر سرگرمیوں اور نقل وحرکت پر نظر رکھتے ہیں اور ویڈیوز بھی ریکارڈ کر لیتے ہیں۔سرخ پانڈا انتہائی نایاب جانور ہے جس کی دم بلی کی طرح لمبی اور قد کم و بیش بڑی بلی جیسا ہوتا ہے لیکن شباہت پانڈا جیسی ہوتی ہے۔