اسلام آباد(نیوز ڈیسک) مری میں شدید برفباری کے باعث ضلعی انتظامیہ نے ہنگامی اقدامات کرتے ہوئے ہائی الرٹ جاری کر دیا ہے، جبکہ شہر کے اندر موجود تقریباً پانچ ہزار گاڑیوں کو محفوظ طریقے سے نکالنے کے لیے ریسکیو اور انخلا کا عمل شروع کر دیا گیا ہے۔ضلعی انتظامیہ کے مطابق شاہراہوں سے برف ہٹانے کے لیے بھاری مشینری، کرینیں اور لوڈرز مسلسل کام کر رہے ہیں۔
شدید برفباری اور حدِ نگاہ صفر ہونے کے باعث مری میں مزید گاڑیوں کے داخلے پر فوری طور پر پابندی عائد کر دی گئی ہے۔ڈپٹی کمشنر نے بتایا کہ سیاحوں کی جان و مال کا تحفظ اولین ترجیح ہے اور تمام دستیاب وسائل اسی مقصد کے لیے بروئے کار لائے جا رہے ہیں۔ انتظامیہ اور پولیس کی ٹیمیں سڑکوں پر موجود ہیں تاکہ انخلا کا عمل بحفاظت مکمل کیا جا سکے۔سیاحوں کو ہدایت کی گئی ہے کہ وہ غیر ضروری طور پر مری میں قیام نہ کریں اور جلد از جلد واپسی اختیار کریں۔ گاڑیوں میں ہیٹر استعمال کرنے والوں کو آکسیجن کی کمی سے بچاؤ کے لیے احتیاطی تدابیر اختیار کرنے کا بھی کہا گیا ہے۔
ضلعی انتظامیہ نے واضح کیا ہے کہ جب تک آخری سیاح محفوظ مقام تک نہیں پہنچ جاتا، تمام افسران اور متعلقہ عملہ فیلڈ میں موجود رہے گا اور امدادی سرگرمیاں جاری رکھی جائیں گی۔
