دبئی(نیوز ڈیسک)پی سی بی کو بالآخر ریکارڈ ساز یونس خان کو نوازنے کا خیال آہی گیا، میڈیا کے بار بار احساس دلانے پرچیئرمین شہریار خان نے 10لاکھ روپے انعام کا اعلان کردیا۔تفصیلات کے مطابق دبئی ٹیسٹ کی دوسری اننگزمیں یونس خان انگلینڈ کیخلاف ابوظبی ٹیسٹ میں ملک کیلیے سب سے زیادرہ رنز اسکورکرنے کے ریکارڈ میں جاوید میانداد کو پیچھے چھوڑ گئے تھے جنھوں نے 124میچوں میں 43 ففٹیز اور 23 سنچریوں کی مدد سے 8 ہزار 832 رنز بنائے تھے، یہ کارنامہ سرانجام دینے کے بعد پی سی بی کی طرف سے کسی انعام کا اعلان نہ کیے جانے پرکرکٹ حلقوں اور میڈیا میں بڑی حیرت اور مایوسی کا اظہار کیا جارہا تھا، بالآخر بورڈ کوخیال آہی گیا، چیئرمین شہریارخان دبئی پہنچے تو تجربہ کار بیٹسمین کے کھیل کی ستائش کرتے ہوئے انھیں10لاکھ روپے انعام سے نوازنے کا اعلان کردیا۔دوسری جانب یونس خان نے مزید ریکارڈز قدموں تلے روندنے کا سلسلہ جاری رکھا، دبئی ٹیسٹ میں وہ 9 ہزار رنز بنانے والے پاکستان کے پہلے اور دنیا ئے کرکٹ کے 14 ویں بیٹسمین بھی بن گئے، آسٹریلیا کے3 بیٹسمین رکی پونٹنگ 13378، ایلن بورڈر11174، اسٹیو وا 10927 رنز بنا چکے۔بھارتی سچن ٹنڈولکر 15921، راہول ڈریوڈ 13288 اور سنیل گواسکر10122، جنوبی افریقی جیک کیلس 13289 اور گریم اسمتھ 9265، ویسٹ انڈین برائن لارا 11953 اورچندر پال 11867 جب کہ سری لنکن کمار سنگاکارا 12400 اورمہیلا جے وردنے 11814 رنز کیساتھ اس فہرست میں شامل ہیں، یونس خان نے 103 میچز میں 54.32 کی اوسط سے 9097 رنز اپنے نام کے آگے درج کرالیے ہیں، ان کیساتھ الیسٹر کک نے بھی 9 ہزار کا سنگ میل عبور کیا ہے، دبئی ٹیسٹ کی دوسری اننگز میں 118 رنز بنانے کے بعد یونس خان ٹیسٹ کرکٹ میں سب سے زیادہ سنچریز بنانے والے ٹاپ 10 بیٹسمینوں کی فہرست میں بھی شامل ہو گئے، انھوں نے 31 ویں تھری فیگر اننگز تراشتے ہوئے میتھیو ہیڈن اور چندرپال کو پیچھے چھوڑدیا، تجربہ کار بیٹسمین اپنے کریئر میں 4 ڈبل اور 1 ٹرپل سنچری بھی بناچکے ہیں، سب سے زیادہ 51 سنچریز سچن ٹنڈولکر نے بنائی ہیں، جیک کیلس 45 دوسرے اور رکی پونٹنگ 41 تیسرے نمبر پرہیں۔ انگلینڈ کیخلاف یونس خان کی یہ تیسری سنچری ہے، محمد یوسف اس ملک کے مقابل سب سے زیادہ 6 تھری فیگر اننگزکھیلنے کا ریکارڈ رکھتے ہیں۔