لاہور (نیوزڈیسک)پاک بھارت کرکٹ تنازعات ،نجم سیٹھی کے عورتوں کو استعمال کرنے کے دعوے نے عوام کا غصہ مزید بڑھادیا، پاکستان اور بھارت کے درمیان تنازعات کے حل کیلئے ٹریک ٹو ڈپلومیسی کے بعد کرکٹ تعلقات میں بھی ٹریک ٹو سامنے آ گیا۔ نجی ٹی وی کے پروگرام میں گفتگو کرتے ہوئے نجم سیٹھی نے انکشاف کیا کہ شیوسینا کے حملے کے بعد پاک بھارت کرکٹ بورڈز کے سربراہان شہریار خان اور ششانک کے درمیان بات چیت دونوں کی بیگمات کے ذریعے ہوتی رہی۔ نجم سیٹھی نے تسلیم کیا کہ شیوسینا کے غنڈوں کے بی سی سی آئی آفس پر حملے کے بعد بھارتی حکام نے ملاقات ملتوی کرنے کا براہ راست اشارہ دے دیا تھا جس پر وہ بھارت چھوڑ کر آ گئے تاہم شہریار خان رک گئے۔ انہوں نے کہا کہ پی سی بی حکام جو مرضی تاویلیں پیش کریں تاہم یہ بات طے ہے کہ پاک بھارت کرکٹ سیریز کے حوالے سے بھارت میں جو کچھ ہوا وہ سب پاکستانیوں کی رسوائی کرنے کا سوچا سمجھا ڈرامہ تھا۔پاکستانی عوام نے پاک بھارت کرکٹ تنازعات کے حل کے لئے پی سی بی کی بھارت کے ہاتھوں ذلت و رسوائی کے بعد بھی بھارت کی منتیں کرنے پر شدید ردعمل کااظہار کیا ہے شائقین کرکٹ نے بھارت سے ہر قسم کے کرکٹ روابط مکمل طورپرختم کرنے کا مطالبہ کیا ہے۔