لاہور(نیوزڈیسک)پاکستان بھارت کے درمیان تنازعات کے حل کیلئے ٹریک ٹو ڈپلومیسی کے بعد کرکٹ تعلقات میں بھی ٹریک ٹو سامنے آ گیا۔ نجی ٹی وی کے پروگرام میں گفتگو کرتے ہوئے نجم سیٹھی نے انکشاف کیا کہ شیوسینا کے حملے کے بعد پاک بھارت کرکٹ بورڈز کے سربراہان کی بیگمات کے ذریعے سے بات چیت ہوتی رہی۔ نجم سیٹھی نے تسلیم کیا کہ شیوسینا کے غنڈوں کے بی سی سی آئی آفس پر حملے کے بعد بھارتی حکام نے ملاقات ملتوی کرنے کا براہ راست اشارہ دے دیا تھا جس پر وہ بھارت چھوڑ کر آ گئے تاہم شہریار خان رک گئے۔ پی سی بی حکام جو مرضی تاویلیں پیش کریں تاہم یہ بات طے ہے کہ پاک بھارت کرکٹ سیریز کے حوالے سے بھارت میں جو کچھ ہوا وہ سب پاکستانیوں کی رسوائی کرنے کا سوچا سمجھا ڈرامہ تھا۔