اسلام آباد (نیوز ڈیسک) بالی ووڈ سپر اسٹار شاہ رخ خان کا کہنا ہے کہ وہ آج بھی خواہشات ایک معصوم بچے کی طرح کرتے ہیں اور اپنی زندگی کے بارے میں مزاحاً کہتے ہیں کہ وہ 250 سال تک زندہ رہیں گے۔بھارتی میڈیا نے شاہ رخ خان کی ایک ویڈیو شیئر کی ہے جو ریڈٹ سمیت مختلف سوشل پلیٹ فارمز پر تیزی سے وائرل ہو رہی ہے۔

اس ویڈیو میں ہدایتکار و کوریوگرافر فرح خان بتاتی ہیں کہ شاہ رخ کا ایک پرانا انٹرویو دوبارہ گردش میں ہے، جس میں میزبان نے پوچھا تھا کہ کیا کبھی آپ کا اسٹارڈم ختم ہو جائے گا؟ اس پر شاہ رخ خان نے جواب دیا تھا کہ وہ اگلے 100 برس تک اسٹار ہی رہیں گے۔ فرح خان نے اس کلپ پر تبصرہ کرتے ہوئے کہا کہ شاہ رخ نے یہ بات اتنے اعتماد سے کہی تھی کہ یوں لگا جیسے ان کے الفاظ ہی حقیقت بن جاتے ہیں۔جواب میں شاہ رخ خان نے اپنی 2007 کی فلم اوم شانتی اوم کے “مینی فیسٹیشن” والے تصور کا ذکر کرتے ہوئے کہا کہ وہ ہر خواہش دل کی سادگی سے کرتے ہیں۔

انہوں نے کہا کہ اگرچہ ان کی عمر 60 سال ہے، مگر وہ آج بھی ایک بچے کی طرح اپنی خواہشوں کے پورا ہونے پر یقین رکھتے ہیں۔اپنی بات مزید واضح کرنے کے لیے انہوں نے ہنستے ہوئے کہا کہ اگر کوئی ان سے پوچھے کہ وہ کتنی عمر تک زندہ رہیں گے تو وہ کہتے ہیں: کم از کم 200 سے 250 سال تو جی ہی لوں گا۔