اسلام آ باد (نیوز ڈ یسک )ممبئی میں بریچ کینڈٰی اسپتال کے ایک ملازم کو اس وقت حراست میں لے لیا گیا جب اس نے لیجنڈری اداکار دھرمیندر اور ان کے اہلِ خانہ کی نہایت نجی ویڈیو خفیہ طور پر بنا کر سوشل میڈیا پر پھیلادی۔89 سالہ دھرمیندر کو ایک روز قبل اسپتال سے ڈسچارج کیا گیا تھا، اور اسی دوران بغیر اجازت بنائی گئی ویڈیو منظرِ عام پر آئی جس میں انہیں نیم بے ہوشی کی حالت میں بستر پر لیٹے دیکھا جا سکتا ہے۔ ویڈیو میں سنی دیول اور بوبی دیول اپنے والد کے پاس کھڑے دکھائی دیتے ہیں، جبکہ کرن اور راجویردیول بھی موجود تھے۔

دھرمیندر کی پہلی اہلیہ پرکاش کور ویڈیو میں انتہائی رنجیدہ حالت میں نظر آئیں۔ویڈیو سامنے آنے کے بعد صارفین نے شدید غم و غصے کا اظہار کیا اور اسپتال انتظامیہ پر زور دیا کہ ایسے حساس لمحات کی ویڈیو بنانے والوں کے خلاف سخت کارروائی ہو۔ ہندوستان ٹائمز کے مطابق وہ ملازم جس نے ویڈیو ریکارڈ اور شیئر کی، پولیس نے اسے گرفتار کر لیا ہے، تاہم تحقیقات ابھی جاری ہیں۔واضح رہے کہ ایک روز قبل سنی دیول نے گھر کے باہر میڈیا نمائندگان کو سختی سے تنبیہ کی تھی کہ وہ خاندان کی نجی زندگی کا احترام کریں، کیونکہ وہ مسلسل کیمرے آن رکھ کر ہر منظر قید کرنے کی کوشش کر رہے تھے۔اس سے پہلے بھی دیول خاندان اس وقت پریشانی میں مبتلا ہوا تھا جب بھارتی میڈیا نے غلطی سے دھرمیندر کی وفات کی جھوٹی خبر چلا دی تھی، جس پر ایشا دیول اور ہیما مالنی نے شدید ردِعمل ظاہر کیا تھا۔