لاہور (نیوز ڈیسک) صوبائی دارالحکومت کے علاقے گلبرگ میں مشہور ٹک ٹاکر سوزین خان کی جانب سے منعقد کی گئی ہیلووین پارٹی پر پولیس نے چھاپہ مار کارروائی کرتے ہوئے 51 مرد و خواتین کو حراست میں لے لیا۔ پولیس حکام کے مطابق کارروائی کے دوران بھاری مقدار میں شراب اور چرس برآمد ہوئی، جبکہ موقع پر موجود تمام شرکاء کو حراست میں لے کر تھانے منتقل کر دیا گیا۔

پولیس ترجمان نے بتایا کہ یہ تقریب بغیر اجازت نامے کے غیر قانونی طور پر منعقد کی گئی تھی، اور شراب نوشی و غیر اخلاقی سرگرمیوں کی اطلاع ملنے پر فوری ایکشن لیا گیا۔
ترجمان کے مطابق، پارٹی کی میزبان سوزین خان سمیت دیگر افراد کے خلاف مقدمہ درج کر کے مزید تحقیقات شروع کر دی گئی ہیں۔
ذرائع نے انکشاف کیا کہ تقریب میں نوجوانوں کی بڑی تعداد شریک تھی اور پولیس کو شور شرابے اور غیر اخلاقی حرکات کی شکایت موصول ہونے پر فوری کارروائی کرنا پڑی۔