واشنگٹن(نیوزڈیسک)امریکا نے ماسکو میں شامی صدر بشار الاسد کے پرجوش استقبال کی سخت مذمت کی ہے،غیرملکی خبررساں ادارے کے مطابق دوروزقبل شام کے صدربشارالاسدکا روسی دارلحکومت ماسکو میں ریڈ کارپٹ استقبال کیا گیا جس کے بعد شامی صدر نے روسی ہم منصب پیوٹن سے ملاقات کی اور دمشق حکومت کے مخالف عناصر کے خلاف جاری جنگ میں روس کی طرف سے فضائی حملوں پر شکریہ ادا کیا تھا۔ روسی اور شامی صدور نے اس ملاقات میں اس امر پر اتفاق رائے بھی کیا تھا کہ شامی تنازعے کے حل کے لیے سیاسی اقدامات کے ساتھ ساتھ فوجی آپریشن کا تسلسل بھی لازمی ہے۔ اسد کے ماسکو میں خیرمقدم پر برہمی کا اظہار کرتے ہوئے وائٹ ہاو س نے ایک بیان میں الزام لگایا ہے کہ یوں ماسکو شام میں سیاسی تبدیلی کے عمل کی راہ میں رکاوٹ ڈالتے ہوئے بشارالاسد کو مزید مضبوط بنا رہا ہے۔